Əhməd Haşım oğlu Qəmərlinski (Əhməd Məlikov) Bakıda anadan olub.

Sultanməcid Qənizadənin məktəbində təhsil alıb.

Səhnəyə ilk dəfə 1907-ci ildə Balaxanıda həvəskar aktyorların hazırladığı “Adı var, özü yox” (Nəcəfbəy Vəzirov) tamaşasında çıxıb. Sonralar “Nicat” Cəmiyyətinin nəzdindəki teatr truppasının aktyoru olub. 1908-ci ildən etibarən kəndləri gəzərək ən ucqar guşələrdə çıxış edib. 1919-cu ildə Bakıdakı truppalar birləşib Dövlət Dram Teatrı kimi fəaliyyətə başlayanda kollektivin aktyor truppasına qəbul olunub (1919-1938). Bakı Türk Azad Tənqid və Təbliğ Teatrında da aktyorluq edib (1921-1924). Bir müddət Azərbaycan Dövlət Musiqili Komediya Teatrında çalışıb (1938-1939).

Dramaturq kimi də fəaliyyət göstərib, 12 əsəri tamaşaya qoyulub. 

Rusiya istehsalı olan “On doqquzuncu il” (1938, rejissor İlya Trauberq) filmində Əhməd Əliyev rolunda çəkilib.

Qəmərlinski ləqəbini ona Hüseyn Ərəblinski verib: Qəmərli kəndindən qastroldan qayıdarkən dostuna Qəmərlinski təxəllüsünü təklif edib və Əhməd həyatının sonunadək bu familiyanı daşıyıb. 

Əməkdar incəsənət xadimi (1940) Əhməd Qəmərlinski 1952-ci ildə vəfat edib.