Həmidə Məmməd qızı Ömərova Bakıda anadan olub.

Ümumittifaq Dövlət Kinematoqrafiya İnstitutunun Aktyorluq fakültəsində təhsil alıb (1975-1979, Y.Metveyevin kursu).

“Azərbaycanfilm” kinostudiyasında (1979-1993), Azərbaycan Kinematoqrafçılar İttifaqında (1992-1993) çalışıb. Azərbaycan televiziyasının “Retro” televiziya proqramında dünya kino tarixindən silsilə verilişlər hazırlayıb (1986-cı ildən), "Kinoştrix" verilişinin ssenari müəllifi (2002), ANS televiziyasında “Seans” verilişinin aparıcısı olub.

500-dən artıq bədii filmin dublyajı və səsləndirilməsində fəal iştirak edib.

Xarici film istehsalçılarının “Diş həkimi” (Rusiya), “Qafqaz yuxuları” (Rusiya) filmlərində, “Onun xoşuna gəlirəm” (1986, rejissor Ənvər Turayev / Tacikistan) filmində Telli rolunda, “Cərrahiyyə əməliyyatı” (1988), “Qara qış” (1992 / İran) filmlərində, “Qorxulu oyunlar” (1992 / Özbəkistan) serialında, “Divlər zindanı” (1993, rejissor Həsən Məmmədzadə / İran) filmində Nuriyə rolunda, Dronqo” (2002, rejissor Zinoviy Royzman / Rusiya) serialında Elmira rolunda, “Silah” (2008, rejissor Aleksandr Kasatkin / Rusiya) serialında çəkilib.

“Azərbaycan kinosunda feminizm”, “ABŞ kinosu: 1895-1945-ci illər”, “Amerika kino tarixi” kitablarını qələmə alıb. Hazırda Azərbaycan Dövlət Mədəniyyət və İncəsənət Universitetinin “Kinoşünaslıq” kafedrasının professorudur.

Əməkdar artist (1988), Xalq artistidir (2005).

Azərbaycan Kinoaktyorlar Gildiyasının sədridir.