Həqiqət Əli qızı Rzayeva Lənkəranın Darquba kəndində anadan olub. 18 aylıqkən atasını itirib. Lənkəranda Məryəm Bayraməlibəyovanın qadın məktəbində, 1923-cü ildən isə Bakıda Pedaqoji Texnikumda təhsil alarkən musiqili tamaşalarda çıxış edib. “Damğa” Teatrında çalışıb. Teatrda işləyə-işləyə Azərbaycan Dövlət Konservatoriyasının muğam şöbəsində təhsil alıb (1928-1932). Opera və Balet Teatrının solisti olub, muğam və xalq mahnılarının ifaçısı kimi tanınıb (1927-1952). Asəf Zeynallı adına Bakı Musiqi Məktəbində dərs deyib. Milli səhnədə çıxış edən ilk azərbaycanlı qadın müğənnilərdəndir. Əməkdar artist (1940), Xalq artisti (1943) Həqiqət Rzayeva 1969-cu ildə vəfat edib.
Aktrisa, müğənni Həqiqət Rzayeva bəstəkar Azər Rzayevin anasıdır.